Uf dr Aalaag "Michelsee", won i noch em Vorbild vo "Wasserfalle" boue ha, han i wie scho dört e Faarläitig uufgstellt. Si isch mit de schlankere Maschte doch no e Runk fyyner uusechoo und gseet no e chly ächter uus.
Die Faarläitig isch en Attrappe oone ächti Funktion. Das häisst, d Pantograafe vo de Lokene häi käi Kontakt mit em Faardroot. Eso chan i derfüür e fyynere Faardroot spanne.
Zum Dritte - Syschtem Michelsee
S isch nadüürlig e chly en äifacheri Bouwyys. Aber i würd sääge, s gseet äigentlig scho zimmlig wien e richtigi SBB-Faarläitig uus.
Zum die Faarläitig z boue, han i zerscht emol uf eme Karton e Leer zäichnet. Do sy alli Määss, won i bruuch aagee, also d Höchi vo de Maschte, d Laag vom Faardroot und den Uusleeger oder dr Abstand vo de Maschte bi de Quertragwärk.
As Boumaterial han i äifach Schiine gnoo, wo me cha verlööte. Die löije sich au guet mit em Syteschnyyder oder dr Trennschyybe chürze. D Maschte müesse nadüürlig höch gnue sy, ass si derno chönne im Boode versänkt yyboue wärde.
Ass die äinzelne Däili bim verlööte nid ständig verrutsche, duen i se mit Chläbband (Abdeckband cha me guet wiider drab nee) uf dr Underlaag fescht mache. Jetz chönne die erschte Querträäger uf äinere Syte glöötet wärde.
Derno wirds ganze Däil umdrääit und d Versträäbige zwüsche de Querträäger aaglöötet. Dasch am Aafang mit dene chlyyne Däili scho e chly e Chnüüblerei gsii.
D Querträäger uf dr andere Syte sy do au scho montiert. D Löötstelle wärde no mit dr Feile suuber verschliffe.
As nöggscht chönne jetz d Uusleeger für dr Faardroot montiert wärde. Für das bruuch i ganz äifach Guufe, won i dr Chopf due abzwicke. Ass die Uusleeger jetz au an die richtig Stell chömme, han i d Laag vom Faardroot mit eme Filzer uf em Querträäger yyzäichnet.
Äinzelni Streckemaschte bou i grad in "seryewyys". Weme emol e chly Routyne het, chunnt me do no rächt guet vorwäärts.
Jetz feele no d Isolatoore. Für das nimm i chlyyni Chrälleli, wo me im Baschtellaade überchunnt.
Die Chrälleli zien i äifach uf d Uusleeger, aso d Guufe, uf und due se mit eme Dröpfli Sekundelyym aachlääbe.
Do isch s Quertragwärk fertig montiert und cha jetz no laggiert wärde. Zum laggiere längt au e Spraydose, wenn dr Lagg vorsichtig in meerere Schichte dünn gsprützt wird. D Uusleeger, wo jo nid farbig wärde, müesse zerscht no mit eme Stückli Chläbband abdeckt wärde.
D Maschte und d Querträäger häi e graui Farb überchoo. D Isolatoore han i mit eme fyyne Marderhoorpinsel mit ere metallic-grüene Farb aagmoolt.
D Maschte stönde versänkt in ere Boorig im Trassee und sy mit e bitz Sekundelyym aagmacht.
Jetz feele numme no d Faardrööt gspanne wärde. As "Faardroot" bruuch i e Faade, won i mit Silber-Metallic Acryl yygfärbt ha (dasch ganz äifach, e chly Farb uf e Duume und Zäigfinger nee und dr Faade derduur zie). Dr Faade, oder Faardroot, duen i mit Sekundelyym an den Uusleeger fescht mache.
E Faarläitig, wo richtig funtioniert, chönnt men eso sicher au boue. S würd aber sicher e sterkere Faardroot bruuche, wo im Druck vo de Pantograafe standhaltet. Das goot derno nadüürlig uf d Chöschte vo dr optische Würkig.
