Uf dr Aalaag "Wasserfalle" han i s erscht Mol e kompletti Faarläitig sälber boue. Uf ere sone chlynere Aalaag cha me das guet üebe, will dr Ufwand nid eso riisig isch.
Dr zweiti Versuech - Version Wasserfalle
Für d "Bouart Wasserfalle" han i für d Maschte Holzprofyl bruucht. D Quertragwerke han i us Schiineprofyl zämme gsetzt, won i vo alte Gläis gnoo ha. Für d Uusleeger han i au do wiider Guufe gnoo.
Die äinzelne Däili han i mit Sekundelyym zämme boue. Das isch denn am Änd doch e rächt ufwändigi Arbet gsii.
S Quertragwärk im linke Bild und dr Streckemascht rächts sy do emol versuechswyys ufgstellt, zum luege, wie und öb alles passt und stimmt.
S fertig laggierti und fescht yyboueni Quertragwärk bi dr rächte Baanhofsyyfaart. D Faarläitig het käi richtigi Funktion, as fyyne "Faardroot" han i e Faade gspanne.
Weme d Faarläitig sälber bout, löije sich nadüürlig au spezielli Maschte mache, wie do an dr Ändstation vo dr Nääbebaan.
Die eso boueni Faarläitig macht alls in allem sicher käi schlächti Falle. Aber eso ganz bin i denn glych noonig zfriide gsii. Vor allem d Maschte häi mi als no z wuchtig dunkt, die sy mir grad uf deere eender chlyne Aalagg äifach no z fescht ins Bild gfalle.
Uf dr Aalaag "Michelsee" han i d Glägehäit gha, nomol e Faarläitig z boue. die isch mir derno doch fyyner glunge.
