Jetz goot s zerscht emol mit em zwäite, aso em rächte Däil vo dr Alaag wyter, ass myni Züügli denn äinischt au emol duur e Landschaft chönne faare.
Die rächti Syte
Gläisbou
D "Gläisplaanig" goot glych wie voraane scho. Zerscht legg i emol d Gläis so öppen aane. Rächts am Rand cha me scho dr Schattebaanhof erkenne, wo dört söll aane choo.
Über die rächti, me chönnt au sääge, die "südlichi" Yfaart vom Baanhof goot denn spööter emol d Hauptstrecki.
Vom Schattebaanhof uus goots über en anderhalb fachi Cheeri bärguuf zum Viadukt. Die Gläiswändel han ich as separats Däil uf em Arbetstisch boue.
Do uf em Bild gseet me d Wändel im Bou, s feelt do aber no e halbe Chräis. Wichtig isch, ass s Gläis, wo bärguuf goot ussen isch. Eso wird wird dr Wääg lenger und däwääg d Styygig weniger stäil.
D Gläiswändel isch fertig worde, do han ich si mit em Viadukt zämmen emol provisorisch ufgstellt. Jetz muess i das alles no richtig zäämebache.
Aso han i d Gläis nomool abgruumt und zerscht dr Underbou stabyl verlyymt. Derno chan i s Trassee vom Schattebaanhof afo boue. As erschts verlyym i d Spante.
Dä Underbou wird wie gwoont au wiider uusgschüümt. Derno chunnt s Trassee as Deckel oobe druf.
Jetz isch au d Gläiswändel fescht yyboue. As nöggschts chan i d Abstellgläis und dr Booge legge, wo d Verbindig zum Baanhof härstellt.
Do entstoot jetz d Yfaart zum Baanhof. S Nääbebaangläis, wo drunder duure goot isch sowyt befeschtigt, ass i s Trassee drüüber cha boue.
Au d Gläis im Schattebaanhof sy jetz fescht verläit und s Viadukt het sy Platz gfunde. Dr Gläisverlauf vo dr Nääbebaan han i au scho feschtgläit. Jetz goots drum, alli Strecke no fertig zämme z schliesse.
D Yfaart mit em Aaschluss an Schattebaanhof isch fertig. Au s Gläis vo dr Nääbestrecki isch jetz agschlosse.
