So, jetz wirds langsam ärnscht. Wenn dr Gläisverlauf emol definitiv fescht stoot, chan i afoo s Trassee ufboue.
Die linggi Syte
Gläisbou
D Baanhofsgläis han i no e chly schreeg zum Rand uusgrichtet. Es gseet am Änd besser uus, wie wenn alles äifach so geometrisch grad isch.
S goot langsam vorwärts mit em Trassee. Dr Chräis vo dr Hauptstrecki han i mit Flexgläis verläit. Dr inneri Booge het e Radius vo öppe 40 cm.
E Stellproob mit em Stedtli. Dr Underbou vom Stedtli muess i no e chly aapasse, ass derno d Züüg spöter au unde duure chömme.
S cha wyter goo. S Trassee für d Baanhofsyyfaart isch scho fescht ufboue. Do muess i no d Flexgläis uf die richtigi Lengi chürze.
S Trassee isch fertig und au d Gläis hind duure ligge. D Styygige vo de Strecke han i quasi chönne halbiere, will jo, vom Baanhof uus gseee d Hauptstrecki gegen uufe und d Nääbebaan gegen aabe goot. Eso wärde die Rampe vill weniger stäil.
Dr Gläisverlauf blybt im groossen und ganze zimmlig äifach. Die ängere Kurve wärde spööter vom Stedtli zuedeckt. D Hauptstrecki goot mit eme elegante lychte Booge bärguuf. D Nääbebaan verlauft uf däm Abschnitt fascht nummen unterirdisch.
D "Nordkurve" in dr Übersicht. Do gseet me guet, wie d Gläis underem Stedtli cheere. S Trassee vo dr Hauptstrecki han i au scho uusgschüümt. Das macht nid numme dr ganz Uufbou stabyler, es isch au gar käi schlächti Schalldämmig.
S Stedtli han i mittlerwylen umboue. Und voila, jetz gönge d Züüg wiider unde duure
D Nääbestrecki verlauft nid offe, wien ich das uf dr Skizze no vorgsee gha ha. Derfür hets im zuedeckte Däil zwäi Abstellgläis gee.
Eso sy d Gläis uf däm lingge Däil scho fascht alli verläit. Jetz sölls mit em rächte Däil vo dr Alaag wyter goo, do bin i no flyssig am plaane.
