Dr zentrali Däil vo dr Alaag isch nadüürlig dr Baanhof Raurach. Vom Baanhof us duen i derno s Trassee ufboue. D Gläisplanskizze bruuch i derzue as Hilf, aber dr definitiv Gläisverlauf legg i diräkt uf dr Alaag fescht, aso grad 1:1.
Die erschte Schritt
Gläisbou
D Gläis vom Baanhof han i uf eme Däilstück scho fescht verläit. Jetz chan i luege, wie s Trassee dran aane chunnt und wies wyter söll verlauffe. Bim Ufbou vom Trassee dänk i au scho draa, wie spööter d Landschaft söll uusgsee. So chan i öppen abschetze, wievill Gläis ass es verdräit, dermit am Schluss glyych no e schöns Gsamtbild derby uuse chunnt.
E praktischi Sach: S Stedtli, won ich no für die alti Alaag as separats Däilstück boue ha, chan i au scho in dr Plaanig berücksichtige.
Dr Gläisplan han ich frei Hand zäichnet. Er isch aso nid gnau im Massstab. S söll äifach emol d Idee vo dr Alaag zäige.
Wien ich das scho dänkt ha, häi sichhets derno bim boue vom Trassee e paar Änderige gee. D Hauptstrecki blybt zimmlig eso, wien ich s zäichnet ha, numme s Viadukt chunnt en anders Plätzli über und e Gläisaschluss zur Saagi chunnt derno no nöimen aane.
D Nääbebaan, wo do uf dr Skizze no as offnigs Gläis hinder em Baanhof duure goot, wird zuedeckt und chunnt derfüür an Abstellgläis über.
Won i die erschte Gläis verläit ha, han i mi no mee oder weniger a my Skizze ghalte. Aber das han i scho gly emol übere Huuffe gworfe. Wenn s Näbebaan-Gläis söll offe ligge, wird das nüt gschyyds mit dr Landschaft und au dr Viadukt loot sich däärewääg nid würklig schön in e glaubhafti Landschaft yyboue.
