Mittlerwyyle bini i mit den Arbete am Gläis scho rächt wyyt cho. Dr nöggscht Schritt isch jetz, d Strecke verbinde, no chan i - ändlig ! - au emol e paar Züüg lo faare, au wenns fürs erschti numme zum teschten isch.
Zerscht emol söll die Zwöigläisigi Hauptstrecki zämmegschlosse wärde. Dr Aschluss vom Gläiswändel an s Viadukt isch scho glunge, s feelt numme no dr letschti Runk.
S letschte Stückli isch d Verbindig über d Baanhofsyfaart. Do chunnt denn spööter emol no e Brugg aane. Im Aschluss an s Viadukt söll no e Gläisaschluss für d Saagi aane choo.
D Gläis vo dr Hauptstrecki sy gschlosse. An de Trafo, wo do scho ummestönde gseet me, ass ich als au scho Teschtfaarte gmacht ha. S het aber no die äint oder ander Schwachstell im Gläis, won i no e chly muess lööte.
Jetz feelt no dr letschti Däil vo dr Nääbestrecki, die isch do au scho im Ufbou.
Mit däm Gläisabschnitt schliesst sich au d Nääbestrecki. Do dermit isch dr gröbschti Däil gschafft.
E bitz z due gits no mit den Abstellgläis im Baanhof. Und für d Saagi söll im Eggen oobe no e Gläisaaschluss entstoo.
Mit em Verlegge vo de Gläis isch en erschti groossi Etappe uf em Wääg uf Raurach gschafft. Dr nöggschti Schritt isch d Verkabelig vo dr Alaag, ass i denn au emol cha d Züügli lo faare.
