S Däilstück mit em Stedtli, won ich jo scho für die alti Alaag boue ha, wött i nadürlig wiider yboue. Ass es au uf die nöiji Alaag passt, hets e chly Umbouarbet gee.
S Stedtli wird umboue
Stadtsanierig
Eso isch s Stedtli uf dr alten Alaag yboue gsii. Will d Gläis uf dr nöijem Alaag anderscht verlauffe, hets däwääg nümme ganz passt.
Dr Underbou muess uf die nöije Verhältnis aapasst wärde und d Hauptstrooss wird höcher gläit, ass si sich nümm mit de Gläis in Wääg chunnt.
D Fuege, wo vom Ufrysse entstande sy, han i suuber verspachtlet und die Stelle derno nöi gstriche.
Mit eme Stückli Grasmatte isch dr Raase nöi aagsetzt. S cha aber guet sy, ass ich dä hinderi Däil vom Stedtli nomol anderscht due gstalte, wenn denn s Stedtli uf dr Alaag stoot und an d Umgääbig aapasst wird.
D Muure han i no schön patiniert und e paar Plakat montiert. S feelt do no e Hüüsli, das isch als no nöime in ere Züügelschachtle. I wirds scho no wiider füüregrüüble.
So, dr umboueni "Stadt-Däil" cha zur Proob ufgstellt wärde. S gseet nid schlächt uus.
Und dr Praxis-Tescht: S passt! Do gönge d Züüg wiider unde duure.
