Zum boue vo mynen äigene Bäum bruuch i Laubflocke, bischpiilswys vo Heki oder äänligi. Die sy uf e fascht unsichtbars Fliis kaschiert, wo sich zimmlig lyycht in die gwünschti Form loot lo bringe.
Als erschts ryss ich e Stück Foliage in drei bis vier Däil uusenand. Die duen i, zum sen uflockere, derno e chly zrächt zupfe.
Jetzt wärde die äinzelne Büschel mit Wysslyym gsprützt, bis si guet nass sy und gnue Lyym ufzooge häi. Duur dr Lyym heebe d Flöckli besser uf em Fliis.
Das mach ich alles in ere groosse Schachtle, ass nid die ganzi Umgääbig mit Flöckli beriislet wird
Böimli boue
S wird grüen
Wenn dr Lyym tröchnet isch, am beschte über d Nacht, chaas wyter goo.
Jetz wärde die scho verrissene Büschel in no chlyneri Däil grisse. Je nochdäm, wievill ass es grad für e bstimmte Baum bruucht.
Für d Baumstämm bruuch i chlyyni Eschtli, won i als bim ene Waldspaziergang due sammle.
Um die Stämm cha jetz s Laub drapiert wärde.
Zum aachlääbe vo däm Fliis bruuch ich e paar Dropfe Heisslyym. Mit ere guete Heisslyympischtoole goot das gar nid eso schlächt. Aber bitte, immer uf d Finger ufpasse!!
S Resuldaat vo deeren Arbet isch e Baum, wo doch zimmlig natüürlig uusgseet.
