Am Byspiil vom Baanhof Raurach wött ich do emol zäige, wien ich myni Hüüsli due boue. As Vorlaag für dr Rauracher Baanhof han ich mir dä vo Kaiseraugscht uusgsuecht. Das passt vo däm här nid schlächt, Kaiseraugscht isch jo s ehemools römische "Augusta Raurica".
Underlaage oder Plään han i chuum gfunde. Aber i wött jo dä Baanhof nid 1:1 nooche boue. Drum längen au e paar Föteli as Vorlaag. Dr Räscht mach i halt äifach per Augemääss...
Wien ich esone Modäll due boue
Hüüsli boue
Konschtruiere duen ich myni Modäll am PC mit eme Zäichnigs- oder Bildbearbäitigsprogramm.
I han efang schon e ganzi Sammlig vo virtuelle "Boudäil", won i je noch Modäll wiider cha bruuche. Mänggisch muess ich die Däili äifach no e chly aapasse. Dr Räscht duen i nöi konschtruiere
Also, zrugg zum Modäll vom Baanhof. Zerscht zäichnen i mol d Düüren und d Fänschter. Mit deene Däil chan i denn d Fassaade konschtruiere.
Jetz häi mer schon emol die erschti Wand. In däm Fall isch das d Gläissyte vom Baanhof. Ganz fertig isch das Däil aber noonig.
Hinder d Fänschter im obere Stock gits no Vorhäng. Wenn denn no e paar Schätte gläit sy, isch die erschti Wand fertig.
Mit ere Muure-Teggschtuur chunnt d Wand none Struktuur über. Derno wird d Fassaade no im gwünschte Farbdoon koloriert.
Genau glyych zäichnen i jetz au die andere Fassaade-Däil. Derno goots hinder d Dächer und Ufboute.
Wenn ich alli Däili fertig zäichnet ha, goots ans drucke. Ich bruuch für myni Hüüsli e stabile Halbkarton mit ere Sterki vo 200g/m2.
Die erschte Däil sy usgschnitte und zum zämme boue parat.
Zum chlääbe bruuch i e Sekundechlääber. Am beschten e Gel, wo nid dropft und nid dervoo- oder über d Finger lauft.
Do isch s Dach im Bou.
Die äinzelne Däil schnyyd i mt em Cutter (Japan-Mässer) zue.
Fälz duen i zerscht lyycht yyritze, ass es e suuber gfalteti Kante git.
S Dach isch deckt. Jetz müesse numme no d Guggeere und d Vordächer über den Yygäng aaboue wärde.
So, das Modäll isch fertig zämme boue. Alli Däili sy draa.
Ganz fertig ischs aber glych noonig. Jetz feelt no s Finish.
As Abschluss wärde jetz no alli Schnitt- und Falzkante retuschiert. Glyychzyttig chunnt dr ganzi Bou no e Patina über, ass er au schöön alt usgseet.
Dr Baanhof Raurach isch fertig boue und ich ha wiider e Hüüsli mee für uf d Alaag.
