Für dr Schlossbärg han i emol zerscht die "Wyssi Flue" müesse modelliere.
Das han i i mit eren äigene Technik gmacht, won i vorhäär am ene Teschtstückli güebt ha.
Und zwar han ich dr Felse mit ere Modelliermasse, wo an dr Luft tröchnet, gstaltet.
So Modellierzüüg gits scho fertig im Baschtellaade oder zum Byschpiil as Holzmääl zum sälber aamische.
Die Masse löije sich noch em tröchne no seer guet wyter bearbäite (schlyffe, boore, saage usw.).
Wenn das Däil über d Nacht tröchnet isch, chas mit Acrylfarb grundiert wärde.
Schwarz mit Wyss und e bitzeli Ocker git e warms grau.
Die Wyssi Flue (alti Alaag)
Fürs Finish bedoon i d Verdieffigen und d Schätte mit lasierendem (stark verdünntem) Schwarz. Die helle Partie und d Spitzeliechter hool i mit Elfebäi und Deckwyss füüre.
Das Üebigsstückli isch do dermit fertig. S gfallt mer gar nid schlächt. Jä guet, derno chan i mi jo hinder d Felswand vo dr Wysse Flue mache.
S Üebigsstück han i derno grad in d Felswand vo dr Wysse Flue yyboue. Me gseets no, dört wo s Grau duur e Fels duure druckt.
Für die groosse Grüenflechene bruuch i Grasmatte, won i aber no mit Farb due bearbäite. E Wyyse isch jo nid äifach glyychmeessig grüen.
Dr Schlossbärg mit em Wildestäi und dr Saagi unde draa chunnt so langsam e Gstalt über. Um s Schloss wachst scho e chly Wald und d Flue het e Grundierig bechoo.
Do het die Wyssi Flue no s Farbfinish überchoo. Erscht mit de Schattierige chunnt d Struktuur vom Felse eso richtig füüre.
Dr Schlossbärg gits esoo nümme. Dr Wildestäi wött i aber in eren äänliche Art und Wys sicher wiider ufboue.
