Zum d Gläis verlegge bruuch ich als Unterbou nid die bekannte Korksträiffe. Das goot au mit eme stabyle Wällkarton. Dä dunkt mi lychter z bearbäite und isch erscht no vill günschtiger, wenn nid gar gratis.
Bi mym erschte Versuech han i as Schotter Gelände-Matte vo Noch verwändet. S Resuldaat het mi grad gar nid chönne begäischtere. Das gseet jo nie und nimmer wien e Schotterbett uus.
Myni Gläisbou-Technik
Gläisbou - s Gläis
Also düe mer doch d Gläis wiider wie gwoont yyschottere. Die Schottermatte bruuch i numme no as Unterlaag zur Schalldämmig. Für das cha me se allerdings seer guet bruuche.
Für dr Unterbou chlääb i mit Wysslyym, oder wenns gschnäller söll go mit Häisslyym zerscht zwäi Sträiffe Karton uffenand.
Jetz chunnt e Sträiffe Schottermatte do druf. Dä duen i mit e bitz verdünntem Wysslyym ufzie. Das git as ganzes d Unterfüeterig fürs äigedlige Schotterbett. D Gläis duen i mit e paar Dröpfli Sekundelyym fescht mache.
Jo, und denn dörf gschotteret wärde. Die bekanntischt Methode, wo me dr Schotter zerscht uf de Gläis verdäilt und derno mit eme Wasser-Lyym-Gmisch fixiert bruuch i nid. I machs e chly anderscht. ich due dr Lyym zwar au mit Wasser verdünne, aber dr Schotter misch i au grad no drunder. Das häisst, s chunnt sovill Schotter derzue, bis es en Art e Mörtel git. mit deere fertig agmachte Schotter-Lyym-Mischig löije sich d Gläis derno rächt züügig yyschottere.
S guet duure tröchnete Schotterbett wird wie d Schiinen au mit Farb no roschtig patiniert. Ich bruuch für das Acrylfarbe (Künschtlerfarbe, käi Acryl-Lagg!). Die Farbe sy noch em tröchne wasserfescht. Eso cha me meereri Laage Farb ufträäge, ooni ass sich d Farbschichte wiider vermische. Wichtig: D Pinsel immer gly guet uuswäsche, ass d Farb dra nid yytröchnet!
E gueti Farbmischig find ich gits mit Siena und e bitzeli Schwarz. D Gläis duen ich deckend noochezie. Dr Schotter wird meer oder weniger stark patiniert, je nochdäm wies grad passt.
Do gseet me die fertig yygschotterete Gläis bi dr rächte Baanhofsyyfaart. Das gseet doch scho gar nid emol eso schlächt uus.
