"Felsestäi" isch vergliche mit den erschte bäide Alaage "Schildburg" und "Walpurgy" scho lycht grösser. Das git denn au mee Ruum für d Gstaltig vom Gländ und für en interessanti Gläisfüerig dur die schöni Bärglandschaft. Trotzdäm chunnt me an chlyne Bööge und rächt stäile Styygige, grad uf dr Bärgstrecki, halt nid verby. Aber esone Aalaag isch jo au nid für langi Schnällzüüg dänkt, no goot das scho.
Dr Gläisplan isch in zwäi Stromchräis ufdäilt. Dr üsseri Chräis liggt durchwäggs uff "Höchi Null". Do cha derno au emol e chly e lengere Zuug faare. D Bärgstrecki, wo am Baanhof rächts abzwygt, schrubt sich in e paar Cheerene in d "Bärge", wo sy denn schliesslig im Tunnel verschwindet.
Felsestäi
Dasch d "Schaltzentraale" vo dr Alaag. D Stüürig blybt äifach. Zum d Wäiche schalte, längt e Stellpültli. D Baanhofsgläis wärde per Stop-Wäiche und s Laadegläis über e Trennstell aa- oder abgschaltet.
