D Alaag "Schilfbach" isch äifach eso zwüscheduuren entstande. I ha do e chly am Wasserfall und am Bächli güebt s Wasser darzstelle. Me gseet aber au, ass men au uf ere sone ganz chlyynen Alaag nid äifach nummen im Chräis muess umme faare. Abgrundet wird die romantischi Idylle von eren "grandiose" Alpekulisse mit Eiger, Mönch und Jungfrau.
Trotz dr chlyyne Grundflächi häi uf deeren Alaag no zwäi Baanhöf Platz gfunde. D Wäiche sy als Handwäichen yyboue, wo bi deere "Gröössi" jo lycht z bediene sy. Eso bruuchts numme no e paar Kabel für dr Faarstrom und für d Belüüchtig.
Ufdäilt isch dä Gläiplan in zwäi Stromchräis, en elektrifizierti Hauptbaan und e Nääbestrecki, wo zur Bärgstation "Oberwasser" füert. Dört müesse d Triibaarzüüg umsetze, das bringt no mee Betriib.
